लूर !!!

नेनी नणदल बुझे भाभी, मेळा में कुण मिलियो ये,
आडका बजार में, नणदोई मिलिया ओ ..
के आंथण आवेला, वा-वा आंथण आवेला
बे नणदल रे घेवरियां ल्यावेला..आंथण आवेला....


नेनी नेनी मेहंदी म्हारी, नणदल बाई दिनी ओ,
मोटोड़ा पछेटा म्हारा सोक दिना ओ ..
बळते काळजिये, वा-वा बळते काळजिये
हाथां री मेहंदी काळी पड़गी ओ..बळते काळजिये....


बाड़ा में बांवळियों उभो, लाम्बी लाम्बी छड़ियां ओ,
परो बढाओ बांवळियों, घड़ाओ पालणियो ..
गीगो पेट में, वा-वा गीगो पेट में 
पालणियो घड़ाओ जेठ में.. गीगो पेट में....


नेनकड़ी पीवर स्यूं आई, माथे ओडी लाइ ओ,
ओडी हेटी मे'ल ने, बतायो गीगो रे ..
गीगो लाड को, वा-वा गीगो लाड को 
उणियारो भंवर रो आवे ओ..गीगो लाड को....


साथणीयां में लूर लेती, पारख कीं कर पाड़ी रे,
रातो थारो घाघरो, असमानी साड़ी रे ..
के पारख पाड़ी रे, वा-वा पारख पाड़ी रे 
रातीये रुमाल वाळो रे ..पारख पाड़ी रे....


बाड़े में बड़बोर उभी, नणदल माथो धोवे ओ,
नणदल चाली सासरे, भोजायां रोवे ओ ..
जोड़ो बिछड़ीयो, वा-वा जोड़ो बिछड़ीयो
नणदोयां थां री बेल बधज्यो ओ.. जोड़ो बिछड़ीयो....


ढोल मजीरा चंग बाजे, गैर किण री आवे ओ,
छैल भंवर जी ढोल बजावे, देवर नाचे ओ ..
होळी आई रे, वा-वा होळी आई रे
देवर ने साथणीयां निरखे ओ.. होळी आई रे ....


म्हारा भंवर तो भणीयोड़ा, अंगरेजी कागद बांचे ओ,
म्हें कांई जाणु, किण किण रा ऐ नांव बांचे ओ ..
भंवर भणीयोड़ा, वा-वा भंवर भणीयोड़ा
भंवर जी थाने कुण भणाया ओ .. भंवर भणीयोड़ा....


पाली आळो पिळो, थां रे दाय पड़े तो ल्याज्यो जी,
फागण रा महिना में पण, आया रहिज्यो जी
के महीनों फागण रो, वा-वा महीनों फागण रो
साथणीयां शिवरात राखी रे .. महीनों फागण रो....

https://www.youtube.com/watch?v=1P3MEhCeLKc